Depression cu zeitindah na tei khawh lai?

Laimi lak zongah  depression neimi hi kan tam ngai cang, a tam deuh nih hin cu kan nei ti an i theilo, i zohkhenhnak caan zong thei lemlo mi kan tampi, depression ka neiko ti aa theimi zong nih zei hleilo hi kan tam chin lengmang ko, a tialtu keimah zong hi kaa tel kho men.

Depression nei hi mino lawngah silo in kum upa lei zong nih a neimi an rak tam tuk ve, I zohkhenhlo in a nunnak liam mi zong an rak tampi cang, mah harnak in kan chuahkhawhnak dingah cawnpiaktu tha le cawnpiaknak kan herh.

Depression hi taksa zawtnak neih nakin a har deuh ti usih law kan palh lem lailo, depression neih ah cun mah lawng in um kan duh, thin a tawi, lungfah  zong a fawi, rawlei ka a thaw tilo, zaan ah I hngilh khawh silo, awmnak hmun pengah um khawh silo, zei thil an tuah hnik poh ah huamlonak nih a zulh peng hna, an tuahmi thil ah an lungthin an pe kholo.

Mah le mah cu minak in a sunglawilo miah an I ruat peng, zeiruangah dah depression hi kan neih ti cu mithiam hna zong nih fiangtein an thei kho rihlo.A cheu nih thluak, chemical cheukhat I thlennawn ruangah a si tiah an ti, minung 10 ah 1 nih cun kan nun chungah hin voikhat tal cu depression kan nei dih tiah mithiam pawl nih an chim.

A cheu nih si in an I zokhenh, asinain depression si cheukhat cu a thawntuk caah taksa caah a thalo a timi zong an um, mah ruang ah cun si tello in depression hi phun tampi in zohkhenh ning a um.

Taksa cawlcanghnak (exercise) hi tuah lengmang ah a tha, lentecelh a huammi kan silo zongah, laam hi taksa cawlcangh nak thabik pakhat asi ve.

Inn chungah I benh penglo ding, innah kan um pengah cun khua zaza ruah a fawite, lengah, hawile sinah len vah pah atha, lungdonghnak tampi hna cu lenglei thil sining nih a thlennawn khawh ve.

Sport lei zoh pahah a tha, sport uarlo mi na si kho men, I hnek chih law sport lei hna na zoh ah cun na ruahnak pawl kha a thlennawn khawh ve.

Ei le din, depression neih ah cun rawl eika a thaw kholo, a si khawh cun thlai hnah, a tlawr tuklo mi ei ah a tha, a tlawr thau tuk mi nih hin minung lungthin a hliphlau ter kholo ti si, a si khawh ah cun sa ei zongah ngasa ei hi a tha.

Hla thangpin sak, hla kan sak hin depression nei cheukhat caah thildang nak hmanh in mi a bawmchan deuh ti si, cun a donghnak ah ca rel, cauk thatha lungthin a nuamh termi cauk relah a tha tiah mithiam pawl nih cun an chim.

Careltu chungin depression neimi kan um ah cun a cunglei bantuk khin rak tuah ve law, san a tlai hrimhrim lai ti ka zumh.










Be the first to comment

Leave a Reply

Your email address will not be published.


*